मुलुकको १० महिनाको बैदेशिक व्यापार

काठमाण्डौ । नेपालले साउनदेखी वैशाखसम्म दश महिनाको अवधिमा कुल १६ खर्ब ९२ अर्ब ९ लाख रुपैयाँ बराबरको वैदेशिक व्यापार गरेको छ । यसमध्ये कूल १४ खर्ब ७४ अर्ब ४१ करोड रुपैयाँ बराबरको आयात गरेको छ भने कूल २ खर्ब १७ अर्ब ९१ करोड १० लाख रुपैयाँ बराबरको वस्तु निर्यात गरेको छ ।

प्रमुख निर्यातका वस्तुहरु

यस अवधिमा नेपालले निर्यात र आयात गरेका प्रमुख पाँचवस्तुहरु निम्नबमोजिम रहेका छन् । यस दश महिनाको अवधिमा नेपालले निर्यात गरेका पाँच वस्तुहरुमा पहिलो नम्बरमा सोयाबिन तेल रहेको छ । यस अवधिमा ३७ करोड ४० लाख ८६ हजार ३६८ किलोग्राम सोयाबिन ७८ अर्ब ७५ करोड ७० लाख ४४ हजार रुपैयाँ बराबरको निर्यात भएको छ ।

दोस्रो नम्बरमा सनफ्लावर तेल रहेको छ । जुन ४ करोड ५७ लाख ७९ हजार २९ लिटरको मूल्य १० अर्ब ९ करोड ४९ लाख ५८ हजार रुपैयाँ बराबरको निर्यात भएको छ । तेस्रो स्थानमा कार्पेट निर्यात रहेको छ । १० महिनामा ८ अर्ब ८४ करोड रुपैयाँ बराबरको कार्पेट निर्यात भएको आँकडा छ ।

चौथो स्थानमा अलैँची रहेको छ । यसको निर्यात ६ अर्ब ६७ करोड रुपैयाँ बराबर रहेको छ । पाँचौं स्थानमा स्टील तथा आइरन रहेको छ । जुन ४ अर्ब ७९ करोड रुपैयाँ बराबर रहेको छ ।

प्रमुख आयातका वस्तुहरु

यो दश महिनाको अवधिमा नेपालले २ खर्ब ६४ अर्बको इन्धन आयात गरेको छ । कुल आयातमा सबैभन्दा ठूलो हिस्सा डिजेलको रहेको छ । डिजेल १ खर्ब २ अर्ब ३८ करोड रुपैयाँ बराबरको भएको छ ।

कुल आयातमा दोस्रो स्थानमा कच्चा सोयाबिन तेल रहेको छ । जुन ८१ अर्ब ८९ करोड रुपैयाँ हाराहारी भित्रिएको छ । तेस्रो स्थानमा पेट्रोल छ । पेट्रोल ५३ अर्ब ५ करोड रुपैयाँ बराबर आएको छ । चौथो स्थानमा खाना पकाउने ग्याँस रहेको छ । जुन ५१ अर्ब ८१ करोड रुपैयाँ बराबर भित्रिएको छ ।