नेपालको सार्वजनिक ऋण बढेर जीडिपीको ४३.९४ प्रतिशत पुग्यो

काठमाण्डौ । चालु आर्थिक वर्षको पहिलो महिना साउनमा सरकारले ४० अर्ब ५७ करोड रूपैयाँ सार्वजनिक ऋण उठाएको छ । यो थपिएको ऋणसहित सरकारले तिर्नुपर्ने कुल ऋण २६ खर्ब ८३ अर्ब रूपैयाँ पुगेको छ । जुन कूल जीडिपीको ४३.९४ प्रतिशत हो ।

कुल ऋणमध्ये १२ खर्ब ८१ अर्ब रूपैयाँ आन्तरिक ऋण र १४ खर्ब २ अर्ब रूपैयाँ बाह्य ऋण पुगेको छ । कुल ऋणमा वैदेशिक ऋणको हिस्सा ५२.२६ प्रतिशत तथा आन्तरिक ऋणको हिस्सा ४७.७४ प्रतिशत पुगेको सार्वजनिक ऋण व्यवस्थापन कार्यालयको तथ्यांकले देखाएको छ ।

चालु आर्थिक वर्षमा सरकारले ५ खर्ब ९५ अर्ब रुपैयाँ सार्वजनिक ऋण लिने लक्ष्य राखेको छ । जसमध्ये आन्तरिक ऋण ३ खर्ब ६२ अर्ब र बाह्य ऋण २ खर्ब ३३ अर्ब छ ।

यस वर्ष सरकारले ऋण सेवा खर्चमा ४ खर्ब ११ अर्ब रुपैयाँ विनियोजन गरेको छ । यसमध्ये साउनमा ३६ अर्ब ६८ करोड रुपैयाँ भुक्तानी भएको छ, जुन वार्षिक बजेटको ८.९३ प्रतिशत हो ।

यसै साउनमा सरकारले आन्तरिक ऋण भुक्तानी ३२ अर्ब २३ करोड गरिएको कार्यलयले जनाएको छ । यसमा साँवा भुक्तानी २७ अर्ब १० करोड र व्याज भुक्तानी ५ अर्ब १३ करोड रहेको छ ।

यसैगरी साउनमा बाह्य ऋण ४ अर्ब ४४ करोड भुक्तानी गरिएको छ । यसमध्ये साँवा ३ अर्ब ४५ करोड र ब्याज ९९ करोड रहेको छ । आन्तरिक र बाह्य दुवै गरी कुल साँवा ३० अर्ब ५५ करोड र ब्याज ६ अर्ब १३ करोड भुक्तानी गरिएको हो ।

चालु आर्थिक वर्षको सुरुमा कुल सार्वजनिक ऋण २६ खर्ब ६९ अर्ब रहेको थियो । उक्त ऋण साउनमा १४ अर्ब रुपैयाँ थपिन पुगेसँगै ऋणको आकार बढ्न पुगेको हो ।